တည်နေရာ
မနက်ခင်း
မျက်လုံးလေးဖွင့်လို့
ကြည့်လိုက်မိတဲ့ခဏ
တောင်တန်းတွေ ပင်လယ်တွေနဲ့
တိတ်ဆိတ်လို့ ငြိမ့်ငြိမ့်လေး
မနေ့ညက ဒီနေရာမှာ ငါ့လှေ ကျောက်ချခဲ့ပါသလား
တစ်သက်မှာတစ်ခါမှ
မကြုံရသေးတဲ့
ခံစားချက်လေး
ဘယ်တော့မှ မေ့လို့မရနိုင်တော့…
လမ်းလျှောက်ရင်း
ဂုန်းကျော် တံတားပေါ်ဖြတ်
အိမ်နဲ့ ဝေးရာ မိုင်ပေါင်းကုဋေကုဋာ
မျက်လုံးလေးမှိတ်လို့
ကမ္ဘာအပြင်ဘက်ကနေ ကိုယ့်ကိုကိုယ်ပြန်ကြည့်
ကိုယ်ဟာ ဒီလိုတည်ရှိနေပါလား
တစ်ခါမှ
စိတ်မကူး ခဲ့တဲ့
အတွေးလေး
ခုထိ သတိရနေခဲ့တာပေါ့…
ရုတ်တရက်
နွေးထွေးတဲ့ နှုတ်ဆက်သံ
ငါ့ရဲ့တည်ရှိမှု ကို လှုပ်နိုး
အိမ်မက်ကို သက်ဝင်စေခဲ့ သော်လည်း
လူးလွန့်ရာ လှိုင်းလေကြား
စိတ်စေရာ မရောက်ဖြစ်
သည်အိမ်မက်ကို
နှုတ်ဆက်ခဲ့ပါတယ်…
လှိုင်ဝေဝေယံ
11 Dec 21
